افتكرت

منير لما قال "عمرك ما تشعر بغربه الا فى حنين مكبوت" كان يقصدنى انا....بس الحكايه مش مجرد احساس بالغربه و الحنين... دى  غربه و حنين و تغيير و احساس بالفراغ...فراغ من جوه مش من بره و فى ايام زى الايام دى الحاجه الوحيده اللى اقدر اعملها هى انى افتكر 

افتكر شكل ماما و هى بتتفرج على فيلم قبل ما تنام...بتبقى صغيره و جميله و افتكر نفسى لما ادخل لها و اقعد على ركبى و اتفرج معاها

افتكر وقفتى فى المطبخ معاها و هى بتحضر لى الغدا بعد ما ارجع من المدرسه و احكى لها احداث يومى

افتكر شكل السما و هى بتنور فى الفجر و انا رايحه المدرسه و صوت القران اللى ببدأ يومى بيه

افتكر ضحكى مع صحابى اللى عمرهم ما سمحوا لى غير بأنى اضحك و افتكر شكلنا و احنا واقفين تحت المطر فى المدرسه...كانت الناس كلها تجرى و تستخبى الا احنا...و نستخبى ليه؟ هو فى احلى من المطر؟

افتكر كل يوم سبت و انا راجعه البيت...لهفتى عليه كأنى غايبه عنه عشر سنين...فاكره لما فيروز كانت تشتكى لى طول الطريق من شلحتها بالدكان و دجره الحيطان منها و اد ايه هى محترفه فى الحزن...ماكنتش باحس بيها لأنى كنت محترفه فى الفرح بس

افتكر اخر رحله لدريم بارك و انتظارنا بالساعه فى الدور...وقفتنا دى كانت احلى من اللعبه نفسها...الضحك فيها بيبقى هستيرى

 افتكرت بردو يوم ما القدر طلع لى لسانه و قال لى :هتسيبى البيت و المدرسه و صحابك و جهزى نفسك لحياه تانيه على مزاجى انا

Change..we don't like it, we fear it but we can't stop it from coming, we either adapt to change or we get left behind.

Meredith Grey...مصممه تأذينى بكلامها الحقيقى اوى ده

افتكرت ميرال الطحاوى اللى ظهرت فى وقت مكانش ينفع ان حد غيرها يظهر فيه لما قالت تعجب الناس كيف ان كل ما تركوه وراءهم من ذكريات بعيده صار امامهم فجأه و ان الاشياء التى محيت من الذاكره و صار بين الناس و بينها بلاد و عباد و قوافل سياره كما يقول العرب...صارت تلك الاشياء ع البال والخاطر...اصبح الماضى الذى فات و انقضى حاضراً بل اصبح يعصف بهم من جديد



انا عايزه السما تمطر عشان ادعى و اجرى و ارقص....عايزه المس المطر...محتاجة اوى احس بالفرق بين الدفى و البرد